الفارس : عايض بن خريص المشيعلي

السلام عليكم ورحمة الله وبركاته


يالقرم لاترقد ترى النوم ماسر= ماثلّب الفقران دب الليالي
الله يعزب عن معازيبنا الشر= ياسمير لو ابطيت ياوسع بالي
عاداتهم ذبح الخروف المتجر= وان غاب الاقصى سد عنه الموالي
اهل رفافٍ فيهن البن الاشقر= ببيوتهم مايفتنن الدلالي
مقحم وناهس والربوع المصطر= ذكرٍ لهلهم باليمن والشمالي
ياراكبٍ مثل الفريد المذعر= اشبوبةٍ ماعودت للغزالي
مرواحها منهم على طلعة الجر= ومسراحها من خشم ابان الموالي
والعصر عند هضيبة الشمط تقهر.= كد وكدت نزل العرب والحلالي
ومادون اهلنا من جذيبٍ مزبر.= ومن واديٍ فيه السلم والسيالي

.
الشاعر الفارس: عايض بن خريص المشيعلي الحربي ( رحمه الله )
.
جد الشاعر: عبدالله بن فاضي بن عايض المشيعلي الحربي
.
ومناسبة القصيده خلاف بين شاعرها عايض بن خريص واحد قبائل بني عمرو الذي استمر عامين كاملين وراح ضحيته ثلاث رقاب من الطرفين الى ان طلبهم الشيخ ناهس بن فاجر الذويبي لحل الخلاف واصلح بينهم بعد الكثير من التفاوض وعادة المياه الى مجاريها واصبحت اخوة بعد ان كانت خصومه ثم اسند عايض بن خريص الابيات المذكوره على مرافقه ولد اخوة مطيع ويبشر ابنه سمير بعودته بعد انتظار دام سنتين



وقد سبق ان ذكر المؤلف الشاعر: نايف بن زابن المعمري الحربي في كتابه روايه كما في مشاركة الاخ سعود الحربي الروايه الاولى
.ونسبة للشوايبه من مطير وفي الاصح هي للشاعر عايض بن خريص المشيعلي و يمدح فيها الذوبه من حرب وقد ارسل الشاعر عبدالله بن فاضي المشيعلي للمؤلف العملاق نايف بن زابن رحمه الله قصيدة وهي:



بسم الكريم الواحد النافع الضار = اللي ضمن رزق العباد وكفلها
علام مكنون الضماير من اسرار.= محي العظام الهامده من هزلها
واسوق قافٍ للمولف استفسار.= عن قصةٍ نسبة على غير اهلها
ذكرت لنا بكتابكم عبر الاسطار= جتنا وشفنا يالمولف خللها
وسمي عليها ووسموها من يسار= واللي وسمها ماعطان بدلها
لامدلي قيمه ولاجاب معذار = مير اسأله بالله كيف احتصلها
ان كان له فيها من الحق معبار.=.نعطيه قصتها وباقي مثلها
قله يجي والا نصيته بمشوار.= عطنا عناوين العميل ونصلها
والا عن العنوه يسد التبيجار.= اذكرله ارقام الندا يتصلها
واحد مكرر ثم خمسه بلا اكرار.= واحد ثلاثه ست يكمل كملها
بعشرين خمسه كامل الرقم مندار.= يبشر برد اخبارنا في عجلها
.اما قنع والا لفتنا له انظار.= ناسٍ تخالط غيضها مع جهلها
اليا بلونا وابتلوا عمي الابصار.= قلت النصيحه واعمى ماقبلها
ماني مدارٍله ولو صار ماصار.= كلٍ وقايع غلطته يحتملها
ياللي رويتم للمولف بالاخبار.= لين المولف عن كلامك نقلها
حنا نقابل ماتقولون بنكار.= بدلايلي واكبر دلايلك قلها
ونبا الحكم .راس المولف ويختار.= يستارد الحجه ويطلب دللها
وليا ثبت حقي مبى منه مخسار.= الا على وضع الصحيح يعدلها
واعطيه شرح السالفه سر وجهار.= من مبتدا القصه اليا مكتملها
عن قصة ابن خريص ياطيب الكار.= ماهي لقايط من لقايط هملها
تعرف ودايم بالدواوين تندار.= بين الرجال اللي قليلٍ زللها
قيلت بعقب عقاب وافين الاشبار.= بمقحم وناهس بالمعاني فصلها
شوخٍ بحزات القسا تشعم النار.= ببيوت يذري ضلها من دخلها
ريف الضعيف يوم لوذات الاسعار.= كمن ضعيفٍ بالمجاعه دهلها
شوخٍ لهم في نجد هيبه ومقدار.= لاهيبت الديره ضعنهم نزلها
شد الذويبي في هوا كل معطار.= تتليه قطعان الجموع ورحلها
بحم الشعاف مطيرة حرش الاوبار.= كلٍ قطيعه شرعت من قبلها
ساجوا بنجد وكل قفرٍ لهم دار.=اليا اختلط نبت الصيوف ونفلها
واليا تعلوا باللقى قحص الامهار.= صكوا على العطفه وساقوا جملها
من عالجوا بسيوفهم ذاق الامرار.= وشلفٍ تويق مع المثاني سللها
كم فارسٍ من ضربهم طاح ماثار.= طاح العقيد وغايته ماوصلها
وكم اغتنى مع دربهم ضعف وافقار.=.بقطعان مالٍ من عدوه جزلها
يوم الكاسيب بالغصايب والاشرار.= هذي مفاعيله وغيره فعلها
لين ان حكم الحق شعشع بالانوار.= صقر الجزيرة زال عنها جهلها
عبدالعزيز اللي حكم كل الاقطار.=بالشرع قانون الجهاله قتلها
لهم مع الحاكم مواقيف الاخيار.=كم مشكلة ناسٍ سعوا في حللها
وكمن سجينٍ فلكوا عنه الاعسار.= عقب الوسايط فيه تعلن فشلها
واللي دفع عايض ندبهم بالاذكار.= عليه من جور الحمول وثقلها.
عليه دين وينتظر طالب الثار.= عامين خزنة بندقه مافصلها
عامين يمشي ويتحذر تحذار.=عليه من دين الرجال وحولها
لين ابو هندي دعاهم للاحظار.= وسط وساطة خير وانهى زعلها
ودع معازيبه وغنى بالاشعار.= مثايلٍ بالقيل هلهل هللها
ماتاه عن معناه بطوال وقصار.= يدرا طواريق المثل عن هزلها
واخلف مقام السالفه كل هذار.= اللي تهقوا بالعلوم يختلها
وشلون بالله ضيروها تضيار.= حسبي على اللي يالمولف شتلها
خلاك تكتبها وخلاني اغار.= وخلى العواذل عندنا تبتهلها
لي وقت احاول مع هل العرف الافكار.= وكثرة علي علوم ناس عذلها
ولاهمني هرج العواذل والاشوار.=( المشكله عودٍ علينا تكلها).
وش عذرنا من مكرم الضيف والجار.= لو مرته بعض الطروش وسئلها
ماتنقص الدنيا ولاتلمس العار.= ولاتمس وجه رجال تكرم سبلها
قصه قديمه مابها طولة اعمار.= لاكن زعلنا يوم قلوا نشلها
تبقى لهلها مع هل العرف تذكار.=وتاج البطوله يفتخربه بطلها
ماقولها تهديد لاكنها انذار.= للي طمع بعلومنا يعتزلها
والله خلق سبع الاراضي والابحار.= دور وتلقالك مع الاناس ملها
وصفحة ثلاثه للمولف استخصار.= هي حل نزاع الكلام وجدلها
لاصار عقب الميت من يشعم النار.= ماتتلف اخباره ويسمل سملها
وعيال عايض بالمواجيب حظار.= النار حيه والحطب في شعلها
من ضرمة ابن خريص دلال ووجار.=برباع ثمً في طابق فللها
ويقال يابن خريص لصغار وكبار.= هويةٍ يفخربها من حملها
لها بساس الطيب مارد ومصدار.= من لابةٍ بالطيب تعرف خصلها
مشاعله سقم العدا سر وجهار.= يشهدلهم سوق المضيق وجبلها
بالقصه اللي للنقى صارت شعار.= قصة نقى بيض الوجيه لدخلها
ساجت من تهامه ليا ضلع سنجار.= قصة نويشي كل حيٍ نقلها
ربعي هل الطولات بالماقف الحار.=مشاعله سقم العداه ومللها
تمت وصلى الله على سيد الابرار.= اللي قوانين الرساله حملها


الشاعر عبدالله بن فاضي بن خريص
وبعد ان وصلت القصيده للمؤلف رحمه الله اعتذر عن الخطأ واوعده بأن يعدلها في الطبعه القادمه من الكتاب ولاكن للأسف حال القدر دون ذلك وتوفي المؤلف رحمه الله قبل طباعة الجزء الثاني
.

واعتذر عن الاطاله

.ودمتم بخير

كعام العايل بيص الله وجهك عاى النقل الرائع