محاورات مستور بن تركي العصيمي

صياف الحربي

اشـوف مستـور العصيمـي جــاب حبـلـه وجمـلـه

وليا قضى تمر الحساء جاني يبي تمر القصيم

ان مــد وحــده مـــن يـديــه امـــلا يـــدي واحـطـلـه

وان كــان مـــد يـديـنـه الثنـتـيـن اقـــول الله كـريــم

مستور العصيمي

ان كان عندك تمر جيتـك بالبعيـر وحملـه

لكن لا تخلط لي التمر الجديد مـع القديـم

اظن صياف السحيمي ناسيا ويـش قلتلـه

وان كان يا صياف ناسي قل بالله العظيم

صياف الحربي

الـتـمـر يامـسـتـور مـــا عـنــدك سـنــون تـاكـلـه

أكل الضروس السوس والنيبان مافيها سليم

ياللـي تـبـي تـرضـي هــذاك وذاك تـبـي تزعـلـه

اهـون عليـك اللفلفـه والا الطـريـق المستقـيـم

مستور العصيمي

لابــدنـــا نـلــقــى لــنـــا غــيـــرك عــمــيــل نـعـامــلــه

وانا ضروسي من حديد وتكسر العظم الصميم

وان كــان مـاتـدرون ويــش الــراي خـلــوه لـهـلـه

قـــد قــيــل بـالامـثــال مــانــزال شــــدد لــــه مـقـيــم

صياف الحربي

يـنـفـك بـــاب الـخـيـر للـطـرقـي وحـظــه يقـفـلـه

درب الصحيح يجيده العاقل ويخطيه الغشيم

الـيــا نـقـصـت الـكـيـل والـمـكـيـال قـلـنــا كـمـلــه

حنـا تـرى ماعندنـا فاصحابنـا خـشـم وخشـيـم

مستور العصيمي

بــان الصحـيـح وكــل رجــال عـرفـنـا مـنـزلـه

احد حياته في شقا واحـد حياتـه فـي نعيـم

اللـي يبـي كحـل العيـون يلـد يمـي واكحـلـه

والا على قول المثل مال الغريم الا الغريم